JSYALLDAYTRAVEL的部落格

16/9/2016  DAY12

最後一日了
 

15/9/2016 Day 11

今日係酒店食早餐 都幾豐富同多選擇
 

既行程就係去梵蒂岡，出發前book好Vatican museum既入場票，16歐羅一個人，有time slot簡既，本身唸住‪09:30‬, 再睇已經full左唯有‪10:30‬～

我地由Termini車站搭去Ottaviano，出站行大約十分鐘就到，一道圍牆分隔兩個國家，我覺得好不可思議，排左一陣安檢就入到去了，建議大家可以book埋tour guide，應該會睇得深入啲同清晰啲～成個博物館好大呀，我地行晒成個館用左三個鐘左右～



之後去左聖伯多祿大殿，去到又係好多人，個天開始落雨又多人既關係，我地係外圍影左啲相就算～
跟住我地行左差唔多半個鐘去聖天使堡，聽個名幾靚，但原來普普通通咁，加上我地Roma pass已用左一次入museum既機會去Colosseo，所以無再比錢入場了


 

呢個時候都差唔多兩點，我地決地去食啲野啦～行到Piazza Navona果邊見到好多餐廳，入左一間度食下pizza, 我地好鍾意飲洋蔥湯架，不過係法式果隻，我地係度嗌左個就發現好唔同，呢度係洋蔥加薯仔去煮既⋯


然後我地去左Pantheon萬神殿，我又買左好多好多post card啦哈哈，隔離街就係La Casa Del Caffeè Tazza D'oro金杯咖啡啦，間鋪好金碧輝煌，門口有好香既咖啡味，重大排長龍添⋯天氣咁熱我地飲唔落espresso啦，唯有食個Gratina di caffee，係個咖啡沙冰甜品，上下有cream咁樣，好濃咖啡味都唔錯～
一條直路向真理之口出發，入場要2歐羅，呢個大家應該都認識啦，係門口影完相就入去Santa Maria in Cosmedin度參觀


參觀完行去Circo Massimo度搭車去Spagna，睇完西班牙廣場之後發現原來呢度係條名店街⋯買左"少少"野之後突然見到啲馬車又想坐下喎，於是問下幾錢，哇成200歐羅一個鐘⋯之後就話半個鐘100歐⋯我地覺得貴就走左了，行左陣有另一位馬伕走黎問我地想去邊，我地話其實都係想四圍遊下，就開價80歐羅半個鐘左右啦，上到車真心覺得好玩，睇野個view唔同左，走到去馬路度同啲車一齊行，個馬伕又會介紹下景點，撞正日落，真係好靚好浪漫，唔知公價幾多啦其實？但呢個價我覺得值既～兜左好大個圈就番左去西班牙廣場度，又見番一開頭開價200歐果位馬伕⋯⋯呆呆的坐係度....




本身plan左七點前要上Altar of the fatherland度睇夜景，但見到條名店街打亂左我地既計劃，拎住好重既戰利品番酒店～休息左一輪就去食飯同賞月！

我地係留下簡左間餐廳食，嗌左ham with melon、pasta、grilled lamb chop & Tiramisu，個melon係好甜好多汁，重好食過日本果啲⋯⋯係街買都係1歐羅一個，個粉入面有餡既，配埋忌廉磨菇汁同青豆都幾好食，個羊架燒得好脆，羊架有羊味，友人係Tiramisu控，其實由到步意大利開始佢已經食左四五個，的確每個地方既tiramisu都會好唔同，淨係用既酒已經有好大分別⋯我地食完就搵左個地方坐底，食下從香港帶黎既月餅... 祝大家中秋節快樂～

14/9/2016 Day 10

今朝我地進行一啲簡單既行程，因為下午告別佛羅倫斯，出發去羅馬了∼
我地去中央市場，朝早都幾熱鬧呀，好多店鋪賣各式各樣既土產，有我地最鍾意既松露，松露醬、油、調味料通通都有∼買左細細包既risotto、松露醬、蕃茄乾等等

之後去左Nerbone度食牛肚包∼佢係位於市場一樓既一個角落，綠色鋪頂，都幾易認架，個包都幾好食，大約3.5歐羅一個

 

食完就上去二樓度午餐，睇左好多間最後決定食松露，嗌左個white truffled risotto & white truffled spaghetti，簡呢款既原因係佢唔係用松露醬去煮，而係用原個松露削落去，加上我地嗌既係白松露，好好好香，引黎途人不少注視，價錢25歐羅一份，如果用黑松露既就20歐，用松露醬既就15歐∼

之後行出市場就係皮革市場啦，有啲似香港女人街既形式，不過賣既全部都係意大利造既皮具∼行下行下就去左聖母百花大教堂，一個小城鎮竟然有咁宏偉既建築，其實有好多地方我地未有時間探索，有機會都會再黎Florence∼
 

我地搭1:48既火車去羅馬


大約15:20去到，出閘後既感覺似係去左另一個國家，成個感覺好唔同，建築風格都有分別∼今晚住既酒店有四星，好乾淨同企理，離Termini車站五分鐘，check in完就去羅馬鬥獸場了

我地落到車站搵到間賣Roma pass既店，我地買左48小時，夠我地用三日，48小時內包去一個museum，鬥獸場都包，另外就任搭市內火車，注意佢已經改左無得去機場用，所以值唔值得買就要計下了。
 

佢地既車票係1.5 歐羅一張，100分鐘內搭，另有24小時車票，7歐羅，當你拍卡搭車就activate。我地搭去Colosseum站大約十五分鐘，一出就係鬥獸場，好宏偉！佢有條隊係for Roma pass既，所以我地直接去到安檢，之後拍卡入場，影左好多靚相，睇左好耐，非常值得入去，如無Roma pass就要比16 歐羅入場∼
 

之後其實都開始入黑，我地行左去Roman Forum, 再沿路去係Altar of the fatherland，係一個好大好靚既殿，睇夜景一流，佢有得上去頂頂，7歐，但過左晚上七點無得上了，

之後行去許願池，到達前果條街叫Via delle Muratte，好多手作同賣藝既人，我地影左張傳統黑白照，睇住佢入黑箱，上色，一張相成十五分鐘先出爐，我地前面有兩pair人，所以都等左差唔多半個幾鐘，但慢工出細貨，張相係好靚∼

 

去到許願池見到好多人拋銀仔落去許願，小心比人幫你影即影即有相，收10歐一張架∼
我地去到呢度已經晚上十點幾，羅馬真係愈夜愈多人，條街重有旅行團係度，我地行番過去鬥獸場，因為個天已經黑晒，影完靚相就番酒店了∼

13/9/2016 Day 9 
今天一早起身，為著既就係去一個超大既Outlet- the Mall, 個巴士站位於Firenze S.M. Novella附近，叫Busitalia Nord Autostazione∼我地08:30左右去到已經排晒長龍啦，第一班車係08:50, 我地要去買左飛先既，來回車票13蚊歐羅一張∼



由於太多人既關係，我地只能上到第二架車

去到已經好多人係Prada門外等候，早起的鳥兒有蟲吃、早起的人兒有包買，最尾都比我搶到兩個∼

之後行左好幾間店，中午去左Gucci cafe度食野，啲野食都幾靚幾精緻，味道不是非常好吃∼去整埋退税手續趕得及搭13:00既車番去啦，擺底完啲野又再出發，去Pisa！
 

我地去車站自己買飛，往Pisa Centrale既飛8.4 歐羅一張，係自動售票機買完之後要去部綠白機仔度，擺張飛入去，就叫validate左張飛，之後就去Venchi食左杯雪糕就上車∼搭左大概一個鐘就到啦，比薩斜塔距離車站原來都要行一段路，差不多20-30分鐘，去到影左啲得意相就走lu，本身唸住上個塔度睇下，但個time slot無晒位，係附近行左陣街買下名信片就離開∼

之後就去番百年老店食意大利雪糕∼
 
 
番到Florence都七點幾啦，今晚再去Zaza度食晚飯，因為佢實在有太多菜式，想再試多幾款，食之前行左附近既central market，二樓係食野既，不過我地留番聽日先食，今晚嗌左truffle & asparagus risotto, BBQ pork ribs同sautéed mussels∼個飯好香既松露味，友人自己食曬一份咁濟，之後個ribs燒得好香肉質亦好好，青口就正正常常∼食完就番酒店休息了∼
 

12/9/2016 Day 8 

今朝一早九點幾就起身check out, 因為得番一個朝早時間係巴黎，下午就要搭飛機去佛羅倫斯啦，所以朝早要把握時間去老佛爺同春天百貨shopping啦，最尾係YSL敗左個包包......題外話巴黎酒店係要比city tax, check out時比既，我地住左兩晚比左幾蚊歐羅

下午搭五點九機，我地預早左時間大約兩點鐘就出門口，搭緊車既途中見到告示用法文話往機場既RER列車有問題，之後又寫住17hr00 recover咁既字樣，我地以為去機場架車停左嚇餐死，去到轉車站Denfert-Rochereau又見到有車喎，應該係有延誤、班次疏啲咁解姐，真係一額汗∼

我地係搭Air France去Florence既，係CDG Terminal 2度落，個機場都幾靚，搞埋啲退稅野同自助check in & 寄倉就去行下，係Paul買左個croissant同杯咖啡hea下就夠鐘了，搭左差唔多1hr25分鐘就到啦，時間過得好快∼

個機場係好細既，拎完行李差唔多八點，行出去就係個bus stop，應該大部分人都係搭呢架Volain bus出downtown既，大約半個鐘車程，每人6蚊歐羅，架車都幾舒服架，機場亦有介紹搭taxi, 大約20-25蚊, 不過我地覺得巴士安全啲∼好快就到個大站Firenze S. M. Novella，好旺，火車站附近一兩條街基本上全部都係酒店，都幾誇張∼
 

行左五分鐘左右就去到我地既酒店Hotel Sempione，個lobby細細地舊舊地，職員好nice好cute，感覺好warm，上到房都幾surprise，設備好齊全，重要有個雪櫃，之前住英、法都無∼


Check in完就行去食ZaZa啦！又係行左五分鐘左右咋，餐廳好大好多人，個menu成本字典咁密密麻麻好誇張好多野食，最正係有頁truffle specialties，全部都係有truffle既dishes
 

我地嗌左Dried Parma ham, burrala cheese with truffle season & Truffled carbonara spaghetti

松露好香好正，多到好似唔洗錢咁丫∼當然都嗌左個最出名既1kg T-bone，無問我地要幾成熟，黎到就係大約三成熟，外面烤得脆脆地，入面就粉紅，好好味，佢附送檸檬既，咁食法都幾得意∼ 
 

最尾甜品嗌左個Tiramisu...可以話係我食遍咁多個地方既tiramisu中最好味之一！
食食下都十一點了，條街重係好多人... 慢慢行番酒店休息∼

11/9/2016 Day 7 

第二日既巴黎 ，
早少少9點左右起身去Bastille Market ~ 
Market 只係星期四同星期日先開架咋
不過今日天陰陰想落雨咁∼都係去買青年票4蚊歐羅坐一日。
去到呢度真係必食無限水果，佢地都會好大方好welcome 狂請你試食，簡單就係水果放題


無花果真係超級好食同抵食！ 試食完超甜！我地即刻買左4粒食...都只係一蚊歐羅！佢地d melon 都係超甜.. 甜過日本多多多多倍又平.... 市集賣1蚊歐羅一個！痴左線... 如果我有刀我都買返去切！

行行下就見到好多好靚好香好多款既芝士，我地都好鐘意食芝士∼ 仲有即場食既生蠔！
好好味呀，食完9隻佢會問你飲唔飲白酒，會用個蠔殼裝比你飲


之後就行左去食crepe, 好多人都推薦要食、 始終都係法國野， 我地揀食最普通食nutella , 我勁愛食！ 好好味呢......！

再戰下一個點就係食雞！ 佢地一隻隻燒雞真係流哂口水..... 我地就買雞脾食， 3.5 歐羅， 勁香勁滑，皮又脆又夠熱，雞味又夠濃，一流∼

我地book左點半鐘去羅浮宮附近食午餐，
叫La Régalade Saint-Honoré，星期日既關係，係得個brunch menu，35 歐羅一個人，頭盤甜品任食，頭盤最好食就係牛油果同螺、甜品就有apricot pudding同原個水蜜桃，好甜呀∼∼
至於main dish我地嗌左隻雞同生牛肉tartar，推介個tartar因為d牛肉好鮮甜，唔似香港果呢咁要落好多調味料
 




食完好飽咁去羅浮宮，前兩年去過，不過未行晒，今次慢慢欣賞展品∼

之後我地就搭車去香榭麗舍大道行街啦，不經不覺已經7點幾啦，個天重係好光;去左mcdonald食下mcfurry 休息下，超多款揀呀！
 

 

之後就去食青口啦∼嗌左兩份，一個就classic！
真係好大煲，不過食下食下 傾下計就食哂成煲了
飽飽離開就去睇夜景！
 

梗係返番去羅浮宮啦，發光既玻璃金字塔！
仲係旁邊享受下甜品同飲杯野，真係一生既最高享受！
 

食完都10點幾..就慢慢返酒店了..
其實原本plan jor 今日早少少回酒店，因為今日911，都驚有咩危險野發生，不過so far都安全。
 

10/9/2016 Day 6

今日最後一日係london la ! 訓到飽先起身！
發現原來咁多日都無好好坐底食過一個all day breakfast! 
咁點得呢？ 
所以係酒店附近間the liberty bounds 食個all day breakfast sin ! 
嘩 一打開個menu .... 我比d cal 嚇親
完完全全唔敢order 哈哈 食一個就全日唔駛食野咁滯啦！我就食small breakfast , 感覺上無咁誇張
同伴就食traditional breakfast ! Wow !


天陰陰呀今日.. 食飽就返酒店拿拿臨拎行李去坐車
我地張車飛43蚊歐羅 , 坐11:01，early bird 買既∼ 
因為尋日已經探左路 今日好快就去到check in 既位置 我地雖然印左paper ticket ， 不過我地都係用QR code 入閘， 過埋X RAY 行李， 比海關印，過程半個鐘有找，仲可以睇下食物機， 慢慢等上euro star!

車上有好大既位置放行李，有洗手間，有wifi ，收得勁差呀下！！！ 訓下教好過！！
車上都有得買野食，仲有得叉電， 不過位置就真係好隱蔽呀！ 大約2個鐘左右就到啦！英國同法國有一小時時差既！



到左巴黎就去買地鐵車飛轉車去酒店先！
因為我地係星期六日一，星期六日可以買青年一日票，4蚊歐羅 任搭。

去到酒店擺底野都3點半，
住ibis paris tour eiffel cambronne 15ème ，係另一位谷友介紹我住既，價格合理安全環境可以，近巴黎鐵塔。
搞掂就出發去老佛爺啦，聽日星期日唔開就今日shopping la!!! 

行左兩個鐘，感覺上同我兩年前去爭好遠，人多左好多！保安都好似加強左！仲有退稅個度簡直係淪陷............
 

搞到6點半左右就去食plan 左既餐廳
La Garnier Restaurant 係春天百貨行去7-10 分鐘好快 ∼ 黎到呢度要食海鮮啦！

叫左個拼盤，鵝肝，蝸牛！飲下野咁！
個menu真係好難睇.. 都需要d時間慢慢睇∼
樣樣野都好鮮甜好好味，食左咁多日英國野，
食下法國野真係好新鮮
外國人大多都係坐outdoor ，所以想有位坐indoor就快d易d ~~~ 
 

埋完單之後就差唔多7點9，就去巴黎鐵塔
慢慢行過去，坐係草地等天黑8點9黑齊天先影相，9點正鐵塔就會閃閃好靚，悠悠閒閒就一個晚上。
 

注意:建議大家要好小心扒手同黑人同騙子
提高警覺，黑口黑面對住佢地，就無人會打你主意

返去酒店休息下，其實我地係巴黎都無咩地方想去，都係想睇下夜景同去多次羅浮宮，
我地兩年前黎去行唔哂，仲有想去睇凱旋門，上次去就維修中好失望。
 

9/9/2016 Day5 

又係新既一日
今日我地既目的地就係cambridge ! 劍橋！
我地期待已久架啦 

今次一個月前就係National rail訂左車飛 
每人£12 來回 standard seat 
我地安排左早餐呢就去brick lane Cereal Killer Cafe∼
位於Brick Lane 呢個地方我諗大家都聽過
簡直就係粟米片發燒友同愛好者既地方
去到好多款揀 好多連見都未見過既粟米片
真係大開眼界 連奶都有N咁多款比你揀
雖然雖然雖然出街比錢食粟米片真係超級奢侈
但真係好想體驗同見識下外國既包裝同款式
食完呢個就去推介黎食既Brick Lane Beigel bake shop ， 呢度開24/7 架！我地就食最出名既Salt beef Beigel ! D牛肉多到滿瀉！梗係加至愛既酸瓜！
一路行一路食 就行去Liverpool street station 坐rail 去Cambridge!


去到個站之後就先先要去拎飛先，
有部機既，跟住d 指引 就可以拎到飛，個站好大呀
上車有得差電真係好 大約1個鐘多d 就去到lu
 

到左就去坐既巴士去city , 基本上任何一架巴士都會經city 既 ， 要比coins坐車既，oyster card 不接受的。

係Grand Arcade商場落車， 呢度最最最出名就係有免費洗手間啦 哈哈！穿過左個商場就係Cambridge city 主菜，Market square, St. mary church.. King's College .. Trinity college , St. john 's college .. 所有景點都係呢度。
 


行幾步就會有人同你兜售river ticket .. 
佢收我地£15.. 好似一般£20? 
D seller &划船人好似大多數都係學生，因為9月去，好多學校都返哂學，唔係好多開放。

上左船就會圍繞住個圈划船，大約45分鐘。
會經過所有college ,包括嘆息橋、數學橋，來來往往都好多船觀光既，佢會同你介紹下講下歷史咁，都好舒服架，欣賞下風景，又有涼風，又有太陽，幾享受。

 

落船之後就去行king's college & chapel ,, 
要比£9 入去，都幾多野睇同好靚，
當然唔少得要去康橋！ 去睇下再別康橋既石碑


行左2個鐘左右就去食下野， 我地係M&S 買左野食係king's college 外圍食， 簡簡單單幾好。
 


4點40就坐rail 返Liverpool street station..
我地就計劃左要去Dark sugars cocoa chocolate ， 
聽講呢度杯朱古力係god of chocolate !

叫左一杯 Classic hot chocolate with chocolate shaving £4 !! 超級靚呀！
佢會用幾種朱古力切碎片比你放面，相機飲先，
然後攪下就溶哂lu~~~~ 係好好飲既！

飲完就買下朱古力，佢地既Truffle chocolate 出名，同埋hand made , 我都幾鐘意食， 又買左d走，
呢度d staff 好nice 好funny 好和諧，
可能食得朱古力多，個人都開心d !
 


之後就去king cross 9 3/4 月台影下指定動作相
其實目的係黎探下路，因為聽日就去paris, 要坐Euro star, 怕聽日拎住行李唔方便， 同埋拎張ticket ， 其實用iphone wallet QR code 都過得關，但我地想儲起張paper ticket ☺️☺️☺️

之後就返酒店休息同執行李，準備完結倫敦之旅。

8/9/2016 Day 4

今日終於見到藍天白雲啦！
天氣好好⋯好得濟超級曬呀 一早起身就去左海徳公園散步
其實都係陪同伴黎，因為我覺得啲花花草草無乜特別
不過就真係好大，係度做運動真係心曠神怡∼ 
 

行左陣就由hyde park corner直去白金漢等睇換兵;
本身以為11:00開始，我地預早左10:30去到唸住霸個好位，
但係果度已經好多人，又唔知邊個先係好位，求其搵左個位置企就算，
點知原來係11:30先開始，呢個時候個太陽愈黎愈猛，
曬左成個鐘加上我生得唔係好高，都無乜心機睇了，未睇完成個儀式就走左啦 
D強國人又左迫右迫好討厭; 加上尋日係溫莎都睇過，大同小異啦

去convent garden醫肚好過！
大約12點幾就去到，果度都幾大有啲市集賣好多特色紀念品，當然有好多餐廳啦
原本bookmark左一間食fish n chips既，但原來離convent garden有段距離，
咁不如直接係convent garden market度開餐啦∼
行左個圈就鎖定左一間又係有得食fisn n chips既餐廳，
首先我地嗌左個ultimate fish n chips、lamb shank同bake camenbert😍個fish n chips係一條好大既cod fish，一堆薯條之餘重有得簡green peas定mushy peas，貪得意就嗌左mushy，係顏碎左既豆黎，用黎夾包食∼個lamb shank既肉汁好好好好味，加上creamy既mash potato好正啊∼呢兩個dish都係£14.99，算係物有所值，以下既bake camembert就真係物超所值，£6.45有成個camembert cheese，伴住幾塊toast，食左幾件覺得膩都照食😋英國人都真係幾friendly，呢餐飯食左一個鐘左右，已經有三四個waitress過黎問下啲野食得唔得，又問我地邊到黎呀吹左陣水咁幾開心∼


食完就行去British museum啦，久仰大名既博物館，外觀已經好宏偉，入面更加非常大∼最感興趣既展品係地下既復活島石像，點解個像唔係係復活島而黎左英國既，佢就寫住"being stolen or a hidden friend"，可能畀人偷左或收埋左係其他地方比人發現左啦哈哈∼之後上左古埃及展區，非常多既木乃伊，真係好壯觀，用現代既科技利用CAT SCAN去掃描木乃伊入面既野，知道佢塞左啲咩物料去防腐，保留左啲咩等等⋯中日韓展館就無乜興趣，主要都係瓷器，我地都算走馬看花咁都行左大概兩個鐘，如果認認真真咁睇真係要花上一整天∼
 




之後我地去左harrods度買下茶包，曲奇同熊仔做手信，果度又係好大要行晒都要好多時間∼原本可以慢慢食個晚飯之後睇歌劇既，但行程第四日先見到藍天白雲，忍唔住去番第一日既景點度影下相;企係waterloo bridge度影下london eye、big ben、巴士等等真係好靚∼

掛住影相既關係匆匆忙忙咁去番Leicester square食晚飯，得番半個鐘都照去原定plan左既拉麵店Shoryu Ramen，位於Regent street，Her majesty theatre附近，拉麵都幾好食既大約£11-12碗，有好多唔同花款，但我地都係鍾情於original∼湯底都幾濃郁，麵又夠實淨，不過我地都無乜時間欣賞，用十分鐘左右就吞左碗拉麵
 

行番去Her majesty theatre睇the Phantom of Opera。步入劇院就已經好開心，覺得好grand好classic，同伴係網上買飛既，入到去同佢對番個名就攞到∼查實我唔明點解友人買飛簡位要由香港睇到今朝先決定到，原來一張平飛（£28）想坐得好睇得舒服真係唔易簡！首先我地坐stalls既O1-2，即係地下想近番個舞台，位置就係最邊位，中場休息同出出入入都好方便，由於劇院係好多年歷史既關係，佢既椅同椅之間係好貼，前後基本上無乜位，你坐中間要出入或者遲左入場就變得非常尷尬，要成行人唔單只企起身重要企出去先有位比你入，當然貴飛講緊£7x-9x張就另計啦，我地張飛唯一缺點係side of view，相對其他會比條柱遮住或睇唔到舞台上半部既好好多，真係多謝友人既用心∼
 

歷時大約三小時既演出，形容唔到，因為非筆墨所能形容⋯只能夠講係非常好睇，下次睇其他歌劇都試下買貴少少既飛欣賞，最後完場大家都企起身拍掌叫好，Bravo！完美的一個晚上∼
 

7/9/2016 Day 3 

Stonehenge + windsor castle + oxford

今日好早就要起身了 我地參加左EvanEvan local tour
會去巨石陣，牛津，同埋溫莎，包入場，不包午餐。
每人團費 £87 會有個耳機比你落車沿途聽佢講野既
7點40 分就要去到tower bridge 附近pick up你 ， 
會有架旅行巴車你去Victoria station 匯合既，會有個工作機會話你知你今日Gate 幾 邊個位置上車

去到就去番我地個團集合既位置，成團都35-40  人架，個導師好好人好風趣講野好好笑 成程都好愉快。
不過個團既首要既規則係
準時！No HOT food ! 準時！No HOT food！
 

我地先先去第一站係溫莎城堡，我期待左好耐了。
10點左右去到，同其他景點一樣都要安檢，有耳機借，同埋今日11:00 都會有換兵睇，安排1.5 小時自由活動比你。
 

 

睇完換兵11:30， 個個都衝走，因為約左11:30 集合，逾時不候架！
我地想早少少走都唔得，因為換兵儀式開始左就會閂大閘唔比人出入，都幾麻煩。
上左車之後發現少左好多人都照開車，真係逾時不候架，個幾個團友咁就掉底左係溫莎等其他團接走/離開， 所以勸勉各位真係準時好。

之後就坐車去巨石陣，因為無lunch time ，我地自己都一早準備左d sandwiches 同零食。

巨石陣可能真係唔係人人都鐘意同岩睇，
去到會有一架轉駁車車你去舊石度， 都幾遠既原來。
呢個時間就要用耳機同evanevan既巨石陣地圖，
只要用耳機好似紅外線咁輕輕觸碰地圖就會有野聽，好高科技咁！
不過我就幾中意呢度， 幾靚丫 ！ 之後係澳洲睇過三姊妹石同12門徒， 下次要去復活島睇！
 

6/9/2016 Day 2

經過左日夜顛倒但又唔肯休息既第一日
今日訓醒好似比人打左一身咁疲累 我諗咁chur 都係趁早趁年輕做 hahaaha

今日第一站係去Sky Garden 
早三星期開始可以online make reservation , it's free !
我地book jor 10:00-11:00 呢個time slot 
我地由酒店行過去只需5-7 分鐘 好快就到
09:00 去到就係大堂登記左先，要show 你地張printed ticket 比佢
登記完就要過一個小小既X光 先準入去

我地先先去左36 樓食早餐先 呢度好靚
美食配美景真係無懈可擊呀！
我地就揀左唔食buffet 食hot food ~~~


食飽就落去睇靚風景同影下相，成個環境都好優雅好舒服
人唔多，因為佢其實都要reservation 先入得去。


11:00 左右走左去M&S 買少少食物準備下一站


我地要坐大約1.5 小時既車轉車去薰衣草園， Mayfield lavender ~ 
本身就係坐tube 到去west Croydon 轉uber / 166 bus 

點知坐坐下話前面既站中斷左，我地提早落車轉uber 啦唯有
London call uber 都幾多車幾方便 好快就到達目的地

一去到，由於薰衣草已經係水尾，過多1星期呢度就close ~~ 
每年6月-9月開放既呢度
所以都要行到好高好入先有薰衣草睇
但呢度真係要提醒大家有無限咁多隻可怕既蜜蜂
我本身真係驚到相都影唔到 但為左靚相頂硬上啦
係度仲食左Lavender Ice cream and have some souvenir
 

跟住我地就坐uber去west croydon然後搭rail番london city
我地先先去左south kensington既tombo食tea，係抹茶愛好者必到的
同伴食左個味噌三文魚便當 我就食左個軟雪糕，重嗌左杯matcha lemonade
 

飲飽食醉就搭去piccadilly circus，由著名既Regent street行街行到去oxford street，條街好靚啊，呢度可以花大半日時間買衫、朱古力、香水等等∼我仲係一間chocolate shop 有豐收

行完就想體驗下搭巴士，就搭左139號巴士往waterloo，沿途經過好多著名景點，例如trafargal square、national art gallery、Her majesty theatre⋯⋯巴士真係舒服過搭tube，有冷氣之餘重欣賞到街景∼


我地行左去london eye果邊睇下夜景，london eye重係coca cola既主題，離遠就望到big ben同waterloo bridge，再夜啲一定重靚，我一定會再番黎睇∼睇完就搭番去piccadilly circus食鵝肝飯！

SO restaurant係位於warwick street，應該算係soho區？因為沿途都經過唔少酒吧，佢地啲酒吧四點幾就開始有人係度飲野，外國人真係識歎⋯⋯

講下間餐廳先，本身誤導左同伴令佢以為呢間餐廳係以鵝肝做主題，其實唔係既，佢係一間日本料理，最好就預約，個鵝肝飯並唔係menu度，佢叫foie gras ju，係一個隱藏料理😨我地嗌左yellowtail capaccio，soft shell crab tempura，chief's selection of Gunkan（軍艦），Today's Sushi，卷物So creamy同兩杯ice green tea，哇真係食到好飽呀∼
埋單係貴既，個飯都£28，加加埋埋都£100了∼

之後就回酒店休息.....
 

5/9/2016 Day 1 

由於之前已經去過法國，威尼斯，米蘭！今次就去羅馬同佛羅倫斯！
今次法國既行程唔會係太多景點安排∼

大約係香港時間 19:10 坐Emirates 飛去杜拜然後去倫敦∼
上左機好快就搵到位坐 49行 都幾前原來一入機倉就係，
A380真係好大架，有上下層，個TV MON都好大，
起飛無耐就開始派餐，我事前order 左low calories meal , 本人on diet中
試下其他餐都好既 會派左特別餐先到standard meal
所以同伴只可以睇住我食

遲下補相比大家睇下個menu 同機倉啦



機上都幾多戲睇，遊戲都好多揀，班架都幾full ~~~ 
休息下睇下自己iPad 食多一個簡餐 8個鐘後就到左杜拜了。


到左杜拜就好快過多一次手提隨身行李Xray就可以自由活動

我係麥當勞怪獸，去到邊都一定要食一餐麥當勞
黎到杜拜當然唔放過啦，真心唔知杜拜錢點計不過我都照食
揀左個中東包款，原來d餐仲有條蕉送架 都幾特別∼